討論區

歡迎, 客人
用戶名: 密碼: 記住我

主題: 馨馨細語:Flying Shears

馨馨細語:Flying Shears 5 years 8 months ago #7110

B) 剪髮剪到入健力士大全,你聽過未?我都未聽見過,直至有日見到徐美玲,呢位早朱玲玲一屆嘅港姐,依然好靚,皮膚幼滑,那頭短髮剪得層次分明,十分標緻,即刻問佢:「你嘅頭髮邊個剪㗎?」心想一定係明星師傅啦,唔係Benny就係Billy或者係阿Kim?!點知佢話係一個喺三藩市返嚟嘅髮型師Bruce Choy。「佢嘅手勢好特別,仲入過健力士大全㗎!」
我哋女士剪頭髮,通常都係洗濕個頭嚟剪,師傅用把梳挑起一束頭髮,扯直,剪齊髮尾。就係咁,左一束,右一束,就剪出咗個髮型嘞。
Bruce用嘅係乾剪無梳法,先洗乾淨頭髮,吹乾,然後先至剪,唔用梳,而係用佢自己發明嘅鉸剪。呢種鉸剪係用三把或五把甚至七把傳統剪髮鉸剪鑄叠起嚟,剪嘅時候,髮型師唔移動拇指,只移動其餘四隻手指,亦唔使用梳,只用一隻手掃撥頭髮,另一隻手就剪,有啲似sculpting,一個層次分明,有型有款嘅髮型就係咁樣撥吓剪吓剪出嚟嘞!
「台上一分鐘,台下十年功」,Bruce話呢個嶄新剪髮方法由意念開始,都花咗差不多成十年時間先至成功,而家佢桃李滿天下,學生嚟自世界各地,近至新加坡、台灣,遠至非洲都有。Bruce叫呢種佢發明嘅剪髮方法做Flying Shears。

葉潔馨
該主題已被封鎖